నల్లగా ఉన్న అమ్మాయి తన రంగు గురించి చాలా నిరాశతో ఉంటుంది. తన రంగు కారణంగానే ఉద్యోగ అవకాశాలు రావడం లేదని చింతిస్తూ ఉండగా మా కంపెనీ క్రీమ్‌ వాడండి… మీ చర్మం రంగు తెల్లగా మారిపోతుందంటూ ఓ అందమైన సినిమా తార చెబుతుంది. ఆ క్రీమ్‌ వాడగానే నల్ల అమ్మాయి తెల్లగా మెరిసిపోవడమే కాదు మంచి ఉద్యోగం సంపాదిస్తుంది…. చర్మం రంగుకి సంబంధించి ఈ తరహా ప్రకటనలు చాలానే చూస్తుంటాం. ఈ మధ్య కాలంలో ఈ విషయంపై చాలామంది గళమెత్తారు. రంగుకీ, వ్యక్తిత్వానికి, విజయానికీ సంబంధం ఉండదు అంటూ చాలామంది నిరూపించారు కూడా. చర్మపు రంగు… సౌందర్య ఉత్పత్తుల పరిశ్రమలు… ఈ నేపథ్యంలో ఓ చిత్రాన్ని నిర్మించడానికి సన్నాహాలు చేస్తున్నారు ప్రముఖ బాలీవుడ్‌ దర్శకుడు సంజయ్‌ లీలా భన్సాలీ. ఆయన ప్రస్తుతం సల్మాన్‌ఖాన్‌, ఆలియాభట్‌తో ‘ఇన్‌షా అల్లా’ తెరకెక్కించే పనిలో ఉన్నారు. ఈ చిత్రం తర్వాత కొత్త నటులతో ఈ కథను తీయాలనేది సంజయ్‌ ఆలోచన అని బాలీవుడ్‌ సమాచారం. పలువురి దర్శకుల్ని పరిశీలిస్తున్నారు. ప్రపంచవ్యాప్తంగా అందరికీ సంబంధించిన కథాంశం కాబట్టే ఈ కథను భన్సాలీ నిర్మించబోతున్నారని ఆయన సన్నిహిత వర్గాలు చెబుతున్నాయి.
