కళ్ల అడుగున ఏర్పడే నల్లని వలయాల్ని పోగొట్టేందుకు ఏవో పూతలు వేసుకోవడమే కాదు…ఈ చిట్కాలూ పాటించి చూడండి. చాలా తక్కువ సమయంలో మార్పు కనిపిస్తుంది.
* ఆహారంలో ఉప్పును ఎక్కువగా తీసుకుంటున్నా చర్మం తేమను గ్రహించే శక్తి కోల్పోతుంది. చర్మం పొడిబారి కంటికింద ఉబ్బినట్లు అవుతుంది. కొన్నాళ్లు ఉప్పు మోతాదు తగ్గించి చూడండి.
* దిండు గలేబుల్ని ఉతక్కుండా ఎక్కువ రోజులు వాడినా… వాటిపై పేరుకున్న క్రిములు చర్మానికి హాని చేయొచ్చు. ముఖ్యంగా కంటి కింది చర్మం నల్లగా ఉబ్బినట్లుగా మారుతుంది. వాటిని కనీసం పదిహేను రోజులకోసారి ఉతకడం మంచిది.
* ముఖానికి వేసుకున్న మేకప్‌ తొలగించకపోయినా ఈ సమస్య ఎదురవుతుంది. అలంకరణ సామగ్రిలోని రసాయనాలు చర్మానికి హాని చేయడమే కారణం. అలంకరణ తొలగించాకా కళ్ల చుట్టూ కొద్దిగా బాదంనూనె రాసి చాలా నెమ్మదిగా మర్దన చేస్తే ఈ సమస్య చాలామటుకూ ఎదురుకాదు.
* కళ్లపై నేరుగా ఎండ పడకుండా చూసుకోవాలి. ఎండలో బయటికి వెళ్లినప్పుడు చలువ కళ్లద్దాలు పెట్టుకోవడం మంచిది. బయటికి వెళ్లి వచ్చిన తరువాత చల్లని నీటిలో ముంచిన తువాలును కళ్లపై వేసి కాసేపు ఉంచితే ఉపశమనం ఉంటుంది.
* నాలుగు చెంచాలను రాత్రంతా ఫ్రిజ్‌లో పెట్టి, మరుసటి రోజు ఉదయం ఒక్కోదాన్ని ఒక్కో కంటి కింద కొంతసేపు ఉంచాలి. ఆ ప్రదేశంలో రక్త ప్రసరణ మెరుగవుతుంది. కళ్లు తాజాగా కనిపిస్తాయి.
* ప్రతి రోజు కనీసం ఏడు నుంచి ఎనిమిది గంటలు నిద్రపోవాలి. కంటికి ఒత్తిడి కలిగించే పనులకు దూరంగా ఉండాలి. అదే పనిగా కంప్యూటర్‌, ఫోన్లు చూడకూడదు. నిద్ర వల్ల వచ్చే ప్రశాంతతతో కంటి కింద చర్మంపై ఒత్తిడి తగ్గి, వలయాలు దూరమవుతాయి.
