‘ఆర్‌ఎక్స్‌100’తో కుర్రకారు మతి పోగొట్టిన భామ పాయల్‌ రాజ్పుత్. ఆ చిత్రం విజయంతో వరుస అవకాశాలు దక్కించుకుంటూ తెలుగు చిత్ర పరిశ్రమలో దూసుకుపోతోంది. తాజాగా ఆమె కథానాయికగా నటించిన చిత్రం ‘ఆర్‌డీఎక్స్‌ లవ్‌’. తేజూస్‌ కంచర్ల కథానాయకుడు. శంకర్‌ భాను దర్శకత్వం వహించారు. మంగళవారం ఈ చిత్ర థియేట్రికల్‌ ట్రైలర్‌ను అగ్ర దర్శకుడు వి.వి.వినాయక్‌ విడుదల చేశారు. ‘నిజంగా మా ఊరి సమస్య తీరుతుందంటే.. ఊరంతా ఆత్మాహుతి చేసుకుంటాం’ అంటూ నరేశ్‌ డైలాగ్‌తో ప్రారంభమైన ట్రైలర్‌ ఆద్యంతం ఉత్కంఠ కలిగించేలా ఉంది. మరి ఆ ఊరి సమస్య ఏంటి? పాయల్‌ రాజ్పుత్ ఆ గ్రామంలో అడుగుపెట్టి సమస్యను ఎలా పరిష్కరించింది? అన్నది తెరపై చూడాలి. ‘వేటాడాలనుకున్న మగాడికి ఆడపిల్ల లేడి పిల్లలా కనిపించవచ్చు. అదే వేటాడాలనుకున్న ఆడపిల్లకి మగ సింహం కూడా కుక్కపిల్లలా కనిపిస్తుంది’ అంటూ పాయల్‌ వార్నింగ్‌ ఇచ్చే డైలాగ్‌ హైలైట్‌గా నిలిచింది.
