శరీరం బరువు తగ్గడానికి, సరైన జీవనశైలి, ఆహార ప్రణాళిక ఉండడమే కాదు, అప్పుడప్పుడూ ఉపవాసం కూడా ఉండాలని న్యూట్రిషనిస్టులు, డాక్టర్స్ చెబుతున్నారు.
చాలామంది రాత్రి భోజనం పూర్తైన తర్వాత కూడా, ఆ నోటికి పని చెప్పడం ఆపరు. ఏదో ఒకటి తింటూ, తాగుతూ ఉంటారు. కానీ, న్యూట్రిషనిస్టులు, డాక్టర్ల ప్రకారం డిన్నర్ – ఉదయం బ్రేక్ ఫాస్ట్ మద్య కనీసం 12-15 గంటల సమయం ఉండాలని చెప్తుంటారు. అంతేకాకుండా, అడపాదడపా ఉపవాసం ఉండడం కూడా మంచిదే అని చెప్తున్నారు. నిజానికి, 16 నుండి 18 గంటలపాటు ఘనాహారం లేకుండా, నీళ్ళు, గ్రీన్-టీ వంటి ద్రవపదార్ధాలను తీసుకుంటూ ఉపవాసం పాటించాలని చెప్తున్నారు.
మీ శరీరానికి, దాని జీర్ణవ్యవస్థకు రెస్ట్ తీసుకోడానికి అప్పుడప్పుడూ తగిన సమయం ఇస్తుండాలి. అలాగని ప్రతిరోజూ కాదు. నిజానికి రోజులో డిన్నర్, బ్రేక్ ఫాస్ట్ మద్య 12-15 గంటల సమయం ఉంటే సరిపోతుంది. అదేవిధంగా అప్పుడప్పుడు, ఈ ఉపవాసాన్ని16-18 గంటలు పాటించేలా చూస్కోవాలని న్యూట్రిషనిస్టులు చెప్తున్నారు.
అడపాదడపా ఉపవాసం చేయడం కూడా,శరీరంలో కొవ్వును తగ్గించడానికి సహాయపడుతుందని కొన్ని అధ్యయనాలు రుజువు చేశాయి. అంతేకాకుండా, ప్రజలు కూడా పెద్ద సంఖ్యలో తరచుగా ఉపవాసం చేయడానికి మొగ్గుచూపుతున్నారు. మన పెద్దలు కూడా, ఏడో ఒక పండుగ, పూజ, వ్రతాలను అడ్డంపెట్టి మనచేత ఉపవాసాలు చేయించేవారు. కానీ, ఆరోగ్యాన్ని దృష్టిలో ఉంచుకున్నవారు, వీటితో సంబంధం లేకుండానే కొన్నిరోజులకు లేదా వారాలకు ఒకసారి ఉపవాసాన్ని పాటించడం అలవాటుగా చేసుకుంటున్నారు. కొందరు పెద్దలు, నిపుణుల సలహా మేరకు, వారంలో ఒక్కపూటైనా ఆహారాన్ని పక్కన పెట్టాలి. కాకపోతే, నీళ్ళు, గ్రీన్ టీ వంటివి తీసుకోవచ్చు.
ఈ అలవాటుకు ఆహార ప్రణాళికలో కొన్నిమార్పులు అవసరంగా ఉంటాయి:
మీరు ఎక్కువ గంటలపాటు ఉపవాసం ఉన్నప్పుడు, మీ శరీరం కూడా జీర్ణక్రియలపరంగా కొంత రిలాక్సింగ్ స్టేజ్ కి వెళ్తుంది. ఈ సమయంలో, భోజనాన్ని జీర్ణం చేయడం, ప్రాసెస్ చేయడం వంటి చర్యలు ఉండవు. ఉపవాసం తర్వాత, ఇన్సులిన్ స్థాయిలు తక్కువగా ఉన్నందున శరీరం కొవ్వును బర్నింగ్ చేసే దశలో ఉంటుంది. శరీరం ఆహారాన్ని శోషించుకునే స్థితిలో ఉన్నప్పుడు ఈ కొవ్వు ఉపయోగంలో ఉండదు.
అడపాదడపా మీరు చేసే ఉపవాసాలు, మీ ఆహార ప్రణాళికను, ప్రవర్తనను ఎట్టిపరిస్థితుల్లో మార్చదు. అంతేకాకుండా, మీకు నచ్చిన ఆహారాన్ని స్వీకరించగలిగేలా మీ శరీర జీవక్రియలు సహాయం చేస్తాయి. అప్పుడప్పుడూ ఉపవాసం చేయడం, క్యాన్సర్ ప్రమాదాన్ని కూడా తగ్గిస్తుందని, క్రమంగా ఆయుష్షు పెరుగుతుందని అధ్యయనాలు తేల్చాయి.
16-18 గంటలపాటు ఉపవాసం ఉండడం మీకు అంత సులభం కాకపోవచ్చు, కాబట్టి 12 గంటల కనీస ఉపవాసంతో ప్రారంభించడం మంచిది. మీరు 12 గంటల ఉపవాసాన్ని అలవాటు చేసుకున్న తర్వాతనే, 16-18 గంటలను పాటించండి. ఇది మిమ్మల్ని 8 నుండి 6 గంటలపాటు ఆహారాన్ని తీసుకునేలా చేస్తుంది.
మీ టైమింగ్స్ ప్రకారం మీరు మీ స్లాట్‌ నిర్ణయించుకోవచ్చు – అనగా, రాత్రి 7.30 నుండి ఉదయం 11.30 వరకు, లేదా రాత్రి 10 నుండి మరుసటి రోజు మధ్యాహ్నం 2 గంటల వరకు ఉపవాసం చేయవచ్చు. మీకు తగినట్లుగా, మీ డిన్నర్ టైమింగ్ సెట్ చేసుకోండి.
ఈ ప్రణాళికకు కొన్ని నియమాలు పెట్టుకోవడం మంచిది. ఒక వ్యక్తి రోజూవారీగా 12 గంటల ఉపవాసాన్ని నిర్ణయించుకోవాలి, దానికి కట్టుబడి ఉండాలి. కొంతమంది పరిశోధకుల అభిప్రాయం ప్రకారం, 10-16 గంటల ఉపవాసం వలన, శరీరం దాని కొవ్వును శక్తిగా మారుస్తుంది. ఇది కీటోన్‌లను రక్తప్రవాహంలోకి పంపిస్తుంది. క్రమంగా బరువు తగ్గడంలో సహాయం చేస్తుంది. ఈ రకమైన ఉపవాస ప్రణాళిక, ఇప్పుడిప్పుడే మొదలుపెడుతున్నవారికి మంచి ఎంపికగా ఉంటుంది. ఎందుకంటే ఈ ఉపవాసం చాలాచిన్నదిగా ఉంటుంది. సగం ఉపవాసం నిద్ర సమయంలోనే జరుగుతుంది. ఈ సమయాన్ని పాటించేవారు, ప్రతిరోజూ అదే సంఖ్యలో కేలరీలను పొందగలడు కూడా.
12 గంటల ఉపవాసానికి సులభమైన మార్గం, ఉపవాస సమయంలో నిద్రను చేర్చడమే…
ఉదాహరణకు, రాత్రి 7 గంటల నుండి ఉదయం 7 గంటల మధ్య సమయంలో ఉపవాసం ఉండేలా చూసుకోవచ్చు. అనగా రాత్రి 7 గంటలకు డిన్నర్ చేస్తే, ఉదయం బ్రేక్ ఫాస్ట్ 7 గంటలకు చేసేలా ప్లాన్ చేయండి. ఈ మద్య సమయంలో ఎక్కువసేపు నిద్రపోతారు కాబట్టి, మీ ఉపవాసానికి అనువుగా ఉంటుంది కూడా. ఇక్కడ ఉపవాసం అంటే, ఆహారం లేకుండా ఉన్న సమయం.
అప్పుడప్పుడు ఉపవాస దీక్షకు కట్టుబడి ఉండడమనేది నిజానికి ఒక సవాలుగానే ఉంటుంది. వీటిని ఎటువంటి సమస్యా లేకుండా పాటించేలా కొన్ని చిట్కాలను అనుసరించవచ్చు. అవేంటో ఇప్పుడు చూద్దాం.
ఉపవాసానికి ప్రధానంగా ఉండాల్సిన నియమం, వీలైనంత హైడ్రేటెడ్ గా ఉండటం: అనగా, తరచూ నీళ్ళు, గ్రీన్ టీ, హెర్బల్ టీ, పండ్లరసాలు వంటి కాలరీలు లేని ద్రవాలను తీసుకోవాలి. ఘనాహారం పక్కన పెట్టొచ్చు, కానీ ద్రవాహారం కూడా పక్కన పెడితే, ఉన్న సమస్యలుపోయి, లేని కొత్తవి తగులుకుంటాయి.
