Food

రాత్రిపూట యాపిల్ అరటిపండు ఎందుకు తినకూడదు?

రాత్రిపూట యాపిల్, అరటి పండ్లు ఎందుకు తినకూడదు? రాత్రి వేళల్లో పండ్లు తిని పడుకోవడం అలవాటా? అయితే, ఈ విషయాలు తప్పకుండా తెలుసుకోవాల్సిందే. ముఖ్యంగా.. యాపిల్, అరటి పండ్లను తినేవారు మిస్ కాకుండా ఇవి తెలుసుకోండి. పండ్లు ఆరోగ్యానికి మేలు చేస్తాయనే సంగతి తెలిసిందే. అయితే, వాటిని ఎప్పుడు పడితే అప్పుడు తినకూడదని ఆహార నిపుణులు చెబుతున్నారు. ముఖ్యంగా కొన్ని పండ్లను రాత్రి వేళల్లో అస్సలు తినొద్దని సూచిస్తున్నారు. ఆ పండ్లలో ‘డాక్టర్’ యాపిల్, ‘మిస్టర్’ బనానా కూడా ఉన్నారు. యాపిల్, అరటి పండ్లు ఎందుకు తినకూడదు? అదేంటీ? యాపిల్ ఆరోగ్యానికి మేలు చేస్తుందని చెబుతారు కదా? రాత్రి వేళ్లల్లో ఎందుకు తినొద్దు అంటున్నారనేగా మీ సందేహం? యాపిల్ తినడం ఆరోగ్యానికి మంచిదే. రోజూ యాపిల్ తినడం వల్ల అందులోని పెక్టిన్ అనే సాల్యుబుల్ అనే ఫైబర్ పదార్థం చక్కెర స్థాయిలను, కొలెస్ట్రాల్‌ను నియంత్రణలో ఉంచుతుంది. యాపిల్ పండులో ఉండే విటమిన్ ఎ, సి, క్యాల్షియం, పొటాషియం వల్ల శరీరానికి పోషకాలు అందుతాయి. క్యాన్సర్, మధుమేహం, గుండెకు సంబంధిత వ్యాధులు, అల్జీమర్స్‌ తదితర వ్యాధులతో పోరాడే శక్తిని యాపిల్ శరీరానికి అందిస్తుంది. 

రాత్రి పూట యాపిల్ తింటే?: 
❂ యాపిల్‌లో పోషకాలే కాదు.. యాసిడ్స్ కూడా ఉంటాయి. రాత్రి వేళ యాపిల్ తిన్నట్లయితే కడుపులో ఆమ్ల స్థాయిలు పెరుగుతాయి. ❂ యాపిల్‌లో వుండే పెక్టిన్ అనే ఫైబర్ జీర్ణ వ్యవస్థపై భారం పడేలా చేస్తుంది. 
❂ పెక్టిన్ వల్ల ఎసిడిటీ కూడా ఏర్పడుతుంది. అందుకే.. యాపిల్‌ను ఉదయం టిఫిన్ తిన్న తర్వాత తీసుకుంటే ఆరోగ్యానికి మేలు జరుగుతుంది.

అరటి పండు తింటే?: అరటి పండు రోగ శరీర రోగ నిరోధక వ్యవస్థను బలోపేతం చేస్తుంది. ఇందులో పొటాషియం ఎక్కువగా, సోడియం తక్కువగా ఉంటుంది. ఫలితంగా బీపీ అదుపులో ఉంటుంది. అరటి పండులోని విటమిన్స్, మినరల్స్, ఫైబర్ వల్ల జీర్ణ సమస్యలు తగ్గుతాయి. అల్సర్ సమస్యలను సైతం అరటి పండు దూరం చేస్తుంది.

రాత్రిపూట అరటి పండు తింటే?:
❂ రాత్రిపూట అరటి పండు తింటే ఊపిరితిత్తుల్లో మ్యూకస్ ఏర్పడి జలుబుకు దారితీస్తుంది. ఈ వైరస్ సీజన్లలో జలుబు చేస్తే అంత సులభంగా తగ్గదు. 
❂ అంతేకాదు.. అరటి పండును పరగడుపున కూడా తీసుకోకూడదు. ఎందుకంటే.. ఇందులో ఉండే అత్యధిక చక్కెరలు తక్షణ శక్తిని అందించినా, అంతే త్వరగా అలసటకు గురిచేస్తాయి. అరటి పండిలోని ఆమ్లతత్త్వం వల్ల జీర్ణసంబంధ సమస్యలు తలెత్తవచ్చు.
❂ అరటి పండు మధ్యాహ్నం పూట తీసుకుంటేనే ఆరోగ్యానికి మంచిది.