వైవిధ్యభరిత నాయికా ప్రాధాన్య చిత్రాలతో ఇటు దక్షిణాది, అటు ఉత్తరాదిలోనూ వరస విజయాలతో సత్తా చాటుతోంది నటి తాప్సీ. ఇప్పుడామె నటుడు విజయ్‌ సేతుపతితో కలిసి నూతన దర్శకుడు దీపక్‌ సుందర్‌రాజన్‌ దర్శకత్వంలో ఓ చిత్రం చేస్తున్న సంగతి తెలిసిందే. కొన్నాళ్లుగా జైపూర్‌ పరిసర ప్రాంతాల్లో చిత్రీకరణ జరుపుకొంటోన్న ఈ సినిమా తాజాగా పూర్తయింది. ఈ విషయాన్ని తాప్సీ ఇన్‌స్టాగ్రామ్‌ వేదికగా తెలియజేసింది. ఈ సందర్భంగా ఆఖరి రోజు సెట్లో దిగిన ఓ ఫొటోని పంచుకుంటూ.. ‘‘కొన్ని నెలల క్రితం ఇదొక సుదూరమైన కలలా అనిపించింది. ఇప్పుడు అది పూర్తయింది. ‘అనబెల్లె’కు వీడ్కోలు సమయం. త్వరలో థియేటర్లో కలుద్దాం’’ అని వ్యాఖ్యానించింది. ఒక విభిన్నమైన పీరియాడికల్‌ కథాంశంతో తెర కెక్కుతోన్న ఈ చిత్రంలో గ్రాఫిక్స్‌కు ప్రాధాన్యమున్నట్లు తెలుస్తోంది. అంతేకాదు ఈ చిత్రంలో తాప్సీ, విజయ్‌ ద్విపాత్రాభినయం చేస్తున్నట్లు సమాచారం.
