తొలి రౌండ్‌ నుంచి మొదలైన సంచలనాల మోత ఫ్రెంచ్‌ ఓపెన్‌లో ఇంకా కొనసాగుతోంది. వందేళ్లకంటే ఎక్కువ చరిత్ర ఉన్న ఈ టోర్నమెంట్‌లో ఎవ్వరూ ఊహించని విధంగా మహిళల సింగిల్స్‌ విభాగంలో తొలిసారి ఓ క్వాలిఫయర్‌ సెమీఫైనల్‌కు దూసుకొచ్చింది. కెరీర్‌లో కేవలం రెండో గ్రాండ్‌స్లామ్‌ టోర్నీ ఆడుతోన్న అర్జెంటీనాకు చెందిన 131వ ర్యాంకర్‌ నదియా పొడొరోస్కా ఈ ఘనత సాధించింది. ఏమాత్రం అంచనాలు లేకుండా పారిస్‌ వచ్చిన 23 ఏళ్ల నదియా తన జోరు కొనసాగిస్తూ క్వార్టర్‌ ఫైనల్లో మూడో సీడ్‌ స్వితోలినాను బోల్తా కొట్టించి సెమీఫైనల్‌ బెర్త్‌ ఖరారు చేసుకుంది.
