Devotional

శివప్రసాదం ఇంటికి ఎందుకు తీసుకురాకూడదు?

Why can't you take siva prasadam home?

‘ప్రసాదం’ అంటే అనుగ్రహం. శివదర్శనంతో, అర్చనతో అనుగ్రహం సంప్రాప్తమవుతుంది. అయితే వస్తురూపేణ ఉండే నిర్మాల్యం మాత్రం తీసుకురారాదు. కానీ అన్నిచోట్లా ఈ నియమమే వర్తించదు. మహాశివభక్తుడైన ‘చండే(డ్రే)శ్వరుడు’ అనే ఒక దేవత తన తపస్సుకి ఫలంగా ‘శివనిర్మాల్యం’ పై అధికారాన్ని వరంగా సంపాదించుకున్నాడు. అందుకే ఆ నిర్మాల్యం అతడికే చెందాలి. ఆ కారణంచేతనే మనం ఇంటికి తీసుకురారాదు. శివలింగం పై నుండి వచ్చే తీర్థాన్ని మనం సేవించవచ్చు, కానీ గర్భగుడి ప్రాకారం బైట ‘నాళం’ (తూము) ద్వారా జారే తీర్థాన్ని మాత్రం సేవించరాదు. దానిపై కూడా చండేశ్వరునిదే అధికారం. అది అతడి సొత్తు. అయితే జ్యోతిర్లింగాలు (కాశి, శ్రీశైలం మొదలైనవి) ఉన్నచోట్ల మాత్రం శివ నిర్మాల్యాన్ని ప్రసాదంగా స్వీకరించవచ్చు. స్ఫటిక, బాణలింగాలున్న చోట కూడా తీసుకోవచ్చు. చండేశ్వర ప్రతిష్ట లేని ఆలయాల లోనూ గ్రహించవచ్చు. ఇంకా స్వయంభూ (అరుణాచలం, కాళహస్తి – వంటివి) లింగములు వద్ద, సిద్ధ ప్రతిష్టిత లింగముల వద్ద నిర్మాల్యాన్ని స్వీకరించవచ్చు. కొన్ని శైవాగమాల ప్రకారం నివేదనల్లో ‘చండభాగం’ అని ఉంటుంది. అలా ఉన్న ఆలయాల్లో శివప్రసాదాన్ని నిరభ్యంతరంగా స్వీకరించవచ్చు.