బీడబ్ల్యూఎఫ్‌ ప్రపంచ టూర్‌ ఫైనల్స్‌ టోర్నీని పీవీ సింధు విజయంతో ముగించగా.. కిదాంబి శ్రీకాంత్‌ మాత్రం హ్యాట్రిక్‌ ఓటమి నమోదు చేశాడు. అంతకుముందే వరుసగా రెండు మ్యాచ్‌ల్లో ఓడిన ఈ భారత బ్యాడ్మింటన్‌ అగ్రశ్రేణి ప్లేయర్లు సెమీస్‌కు దూరమైన సంగతి తెలిసిందే. శుక్రవారం నామమాత్రమైన తన మూడో మ్యాచ్‌లో ప్రపంచ ఛాంపియన్‌ సింధు 21-18, 21-15 తేడాతో పోర్న్‌పావీ (థాయ్‌లాండ్‌)పై ఓదార్పు విజయాన్ని అందుకుంది. మ్యాచ్‌లో పూర్తి ఆధిపత్యం చలాయించిన సింధు.. వరుస గేమ్‌ల్లో ప్రత్యర్థిని చిత్తుచేసింది. తొలి గేమ్‌లో ఆరంభం నుంచి దూకుడు ప్రదర్శించిన ఆమె 9-5తో ఆధిక్యంలోకి దూసుకెళ్లింది. కానీ తిరిగి పుంజుకున్న ప్రత్యర్థి ఓ దశలో 16-15తో ఆధిపత్యం ప్రదర్శించింది. సింధు ప్రతిఘటించి 16-16తో స్కోరు సమం చేసింది. అదే జోరు కొనసాగించిన తను చివర్లో వరుసగా మూడు పాయింట్లు నెగ్గి గేమ్‌ సొంతం చేసుకుంది. రెండో గేమ్‌లో రెట్టించిన ఉత్సాహంతో ఆడిన ఆమె ఆరంభంలోనే 6-0తో ఆధిక్యం సాధించింది. అదే దూకుడు కొనసాగించి ప్రత్యర్థిని ఓడించింది. మరోవైపు పురుషుల సింగిల్స్‌లో శ్రీకాంత్‌ 21-12, 18-21, 19-21తో లాంగ్‌ ఆగ్నస్‌ (హాంకాంగ్‌) చేతిలో పరాజయం పాలయ్యాడు. బీడబ్ల్యూఎఫ్‌ ర్యాంకింగ్స్‌లో తనకంటే మెరుగైన స్థానంలో ఉన్న ప్రత్యర్థిపై మంచి ఆటతీరుతో తొలి గేమ్‌ సొంతం చేసుకున్న శ్రీకాంత్‌.. ఆ తర్వాత వెనకబడ్డాడు. రెండో గేమ్‌లోనూ ఓ దశలో 13-10తో ఆధిక్యం సాధించినప్పటికీ.. ప్రత్యర్థి పుంజుకోవడంతో ఓటమి తప్పలేదు. ఇక నిర్ణయాత్మక మూడో గేమ్‌లో పోరు హోరాహోరీగా సాగింది. 19-19తో స్కోరు సమమైన దశలో ప్రత్యర్థి వరుసగా రెండు పాయింట్లు సాధించి మ్యాచ్‌ చేజిక్కించుకున్నాడు. బీడబ్ల్యూఎఫ్‌ ప్రపంచ టూర్‌ ఫైనల్స్‌ టోర్నీలో తనకు మంచి ముగింపే లభించిందని సింధు తెలిపింది. సుదీర్ఘ విరామం తర్వాత ఈ నెలలో యొనెక్స్‌ థాయ్‌లాండ్‌ ఓపెన్‌లో ఆడిన ఆమె.. తొలి రౌండ్లోనే ఓడిన సంగతి తెలిసిందే. టయొటా థాయ్‌లాండ్‌ ఓపెన్‌లో క్వార్టర్స్‌ వరకూ వెళ్లగలిగింది.
