ప్రతిష్ఠాత్మక వింబుల్డన్‌ గ్రాండ్‌స్లామ్‌ టోర్నీలో తొలి రోజే సంచలనం నమోదైంది. మూడో సీడ్‌ స్టెఫనోస్‌ సిట్సిపాస్‌ తొలి రౌండ్‌లోనే అన్‌సీడెడ్‌ చేతిలో ఖంగుతిన్నాడు. పక్షం రోజుల క్రితం ఫ్రెంచ్‌ ఓపెన్‌ ఫైనల్‌లో ప్రపంచ నంబర్‌వన్‌ నొవాక్‌ జొకోవిచ్‌కు చెమటలు పట్టించిన సిట్సిపాస్‌ పచ్చిక కోర్టులో చతికిలపడి షాక్‌కు గురయ్యాడు. సెర్బియా వీరుడు జొకోవిచ్‌ తొలి సెట్‌ కోల్పోయినా ఆ తర్వాత అదరగొట్టి ముందడుగేశాడు. మహిళల సింగిల్స్‌లో సంబలెంక, ముగురుజ తొలి మెట్టు దాటగా.. క్విటోవాకు నిరాశఎదురైంది.
