అరవై ఏళ్ల మహిళకు పాతికేళ్ల కుర్రాడికి పెళ్లి అయితే ఎలా ఉంటుంది..? అసలు అలా పెళ్లి చేసుకోవాల్సిన అవసరం ఏం వచ్చింది..? మరి వాళ్లిద్దరూ జీవితాంతం కలిసి ఉన్నారా..? అనే ఆసక్తికరమైన కథాంశంతో తెరకెక్కిన వినోదాత్మక చిత్రం ‘సావిత్రి w/o సత్యమూర్తి’. ప్రముఖ హాస్యనటి శ్రీలక్ష్మి, ‘కేరింత’ ఫేమ్‌ పార్వతీశం భార్యభర్తలుగా నటించారు. ఈ చిత్రం ఆగస్టులో ప్రేక్షకుల ముందుకు రానుంది. ఈ సినిమాతో చైతన్య కొండ దర్శకుడిగా పరిచయం కాబోతున్నారు. ఏ1 మహేంద్ర క్రియేషన్స్ పతాకంపై గోగుల నరేంద్ర నిర్మించారు. ఈ చిత్రంలో శివారెడ్డి, సుమన్ శెట్టి, గౌతంరాజు, అనంత్, జెన్ని, సుబ్బరాయశర్మ, కోట శంకరావు, పద్మజయంతి తదితరులు కీలకపాత్రలు పోషించారు. సత్య కశ్యప్ సంగీతం అందించారు. ‘‘కుటుంబసమేతంగా చూడదగ్గ మంచి వినోదాత్మక చిత్రం. పార్వతీశం, శ్రీలక్ష్మి జంట నవ్వులు పూయిస్తుంది. ఈ సినిమాతో ముగ్గురు కొత్త కథానాయికలను పరిచయం చేస్తున్నాం. త్వరలో వాళ్లను ప్రేక్షకుల ముందుకు తీసుకొస్తాం. హైదరాబాద్, అరకు, ఈస్ట్ గోదావరి, వైజాగ్ పరిసర ప్రాంతాల్లో 45 రోజులు చిత్రీకరణ చేశాం. ప్రస్తుతం నిర్మాణానంతర కార్యక్రమాలు జరుగుతున్నాయి’’ అని నిర్మాత చెప్పారు.
