తాలిబన్ల ఆక్రమణతో అఫ్గానిస్థాన్లో పరిస్థితులు దారుణంగా మారాయి.
దీంతో తాలిబన్ల చెరలో బతకలేమని భావించిన ప్రజలు దేశాన్ని వీడుతున్నారు. ప్రభుత్వ అధికారులు సైతం విదేశాల బాటపట్టారు.
ఈ నేపథ్యంలో ఆ దేశ ఓ మాజీ మంత్రి సయ్యద్ అహ్మద్ షా సాదత్ చేస్తున్న పని నెటిజన్లను ఆశ్చర్యానికి గురిచేసింది.
గతంలో సమాచార సాంకేతిక శాఖ మంత్రిగా పని చేసిన సయ్యద్ ప్రస్తుతం జర్మనీలో పిజ్జా డెలివరీ బాయ్‌గా పని చేస్తున్నట్లుగా తెలుస్తోంది.
ఈ మేరకు సామాజిక మాధ్యమాల్లో ఆయన ఫోటోలు వైరల్ అవుతున్నాయి.
2018లో సమాచార, సాంకేతిక మంత్రిగా బాధ్యతలు చేపట్టిన సయ్యద్ రెండేళ్లు ఆ పదవిలో కొనసాగారు.
కొన్ని కారణాల దృష్ట్యా 2020లో మంత్రి పదవికి రాజీనామా చేసి ఆ తర్వాత జర్మనీకి వెళ్లిపోయినట్లు అరబిక్ వార్తా సంస్థలు పేర్కొన్నాయి.
జర్మనీలోని లీప్‌జిగ్‌లో సైకిల్పై పిజ్జా డెలివరీ చేస్తున్నట్లు, గతంలో మంత్రిగా పని చేసిన ఫొటోలను ట్వీట్ చేశాయి.
సయ్యద్.. ఆక్స్ఫర్డ్ విశ్వవిద్యాలయంలో కమ్యూనికేషన్, ఎలక్ట్రానిక్ ఇంజినీరింగ్లో మాస్టర్ డిగ్రీలు పూర్తి చేసినట్లు ఓ మీడియా సంస్థ పేర్కొంది.
