తమిళనాడులోని చెన్నైకి చెందిన ఓ ఐటీ కంపెనీ సంచలన నిర్ణయం తీసుకుంది. కంపెనీ ఎదుగుదలలో శ్రమించిన ఉద్యోగుల కష్టాన్ని గుర్గించింది. ఏళ్ల తరబడి కంపెనీ అభివృద్ధికి తోడ్పాటును అందించిన ఉద్యోగులకు కార్లను బహుమతిగా అందించింది.తమిళనాడుకు చెందిన ఐడియాస్‌2ఐటీ కంపెనీ చెన్నై కేంద్రంగా పని చేస్తోంది. ఒకప్పుడు చిన్న కంపెనీగా మొదలై నేడు 500ల మంది పని చేసే స్థాయికి చేరుకుంది. అయితే పదేళ్ల కిందట ఈ కంపెనీ ప్రస్థానం మొదలైనప్పుడు.. ముందుగా నిర్దేశించుకున్న లక్ష్యాలను కనుక చేరితే కంపెనీ లాభాలను ఉద్యోగులకు పంచి ఇస్తామంటూ ప్రకటించింది.నష్టాల్లో ఉన్నప్పుడు ఒకలా, లాభాల్లోకి వచ్చినప్పుడు మరోలా ఐడియాస్‌2ఐటీ కంపెనీ యాజమాన్యం భావించలేదు. పదేళ్ల క్రితం ఐడియాస్‌2ఐటీ కంపెనీ యాజమాన్యం ఇచ్చిన మాట నిలుపుకునే తరుణం వచ్చినట్టుగా గుర్తించింది. అనుకున్నదే తడవుగా కంపెనీ అభివృద్ధికి పాటుపడిన వంద మంది ఉద్యోగులను గుర్తించి.. అందరికీ ఒకేసారి మారుతి సుజూకి కంపెనీకి చెందిన కార్లను బహుమతిగా అందించింది. వారి కుటుంబ సభ్యులను పిలిచి ఓ వేడుకగా ఈ కార్లను అందజేసింది.
