టోక్యో వేదికగా మరో రెండు రోజుల్లో జరగనున్న క్వాడ్ సదస్సు.. పలు కీలక అంశాలపై చర్చించేందుకు నాలుగు దేశాల నాయకులకు గొప్ప అవకాశంగా పేర్కొన్నారు ప్రధానమంత్రి నరేంద్ర మోదీ. జపాన్ పర్యటనకు బయలుదేరే ముందు క్వాడ్ సదస్సు, జపాన్- భారత్ సంబంధాలపై కీలక వ్యాఖ్యలు చేశారు. మరోవైపు.. ఇండో ఫసిపిక్ ప్రాంతంలో చైనా కదలికలపై ప్రధానంగా చర్చించే అవకాశం ఉంది.
జపాన్లో ఈనెల 24న జరగనున్న క్వాడ్ దేశాధినేతల సమావేశంలో పాల్గొననున్నారు ప్రధానమంత్రి నరేంద్ర మోదీ. ఇందులో భాగంగా జపాన్ పర్యటనకు బయలుదేరే ముందు క్వాడ్ సదస్సుపై కీలక వ్యాఖ్యలు చేశారు. ఈ గ్రూప్ మొదలుపెట్టిన పలు పనుల పురోగతిని సమీక్షించటం, ఇండో- ఫసిఫిక్ ప్రాంత అభివృద్ధి, అంతర్జాతీయ అంశాలపై ఆలోచనలు పంచుకునేందుకు ఈ సమావేశం గొప్ప అవకాశంగా పేర్కొన్నారు. మే 23-24 మధ్య రెండు రోజుల పాటు జపాన్లో పర్యటించనున్నారు భారత ప్రధాని.
” ఈ పర్యటనలో భాగంగా అమెరికా అధ్యక్షుడు జో బైడెన్తో ద్వైపాక్షిక సమావేశంలో పాల్గొననున్నాను. బహుముఖ ద్వైపాక్షిక సంబంధాల బలోపేతం, ప్రాంతీయ అభివృద్ధి, అంతర్జాతీయ సవాళ్లపై చర్చించనున్నాం. జపాన్ ప్రధాని ఫుమియో కిషిదా ఆహ్వానం మేరకు టోక్యో వెళ్తున్నాను. టోక్యో పర్యటన సందర్భంగా.. భారత్- జపాన్ ప్రత్యేక వ్యూహాత్మక, అంతర్జాతీయ భాగస్వామ్యాన్ని మరింత బలోపేతం చేసేందుకు చర్చలు చేపడతాం. ఆ తర్వాత జపాన్లో జరగనున్న క్వాడ్ దేశాధినేతల సమావేశంలో పాల్గొంటాను. ఈ గ్రూప్ మొదలుపెట్టిన పనుల పురోగతిని సమీక్షించేందుకు నాలుగు దేశాల నేతలకు ఈ సదస్సు గొప్ప అవకాశం. అలాగే.. ఇండో-ఫసిపిక్ ప్రాంత అభివృద్ధి, అంతర్జాతీయ అంశాలపై మా ఆలోచనలను పంచుకోనున్నాం.”- నరేంద్ర మోదీ, ప్రధానమంత్రి.
తొలిసారి క్వాడ్ సదస్సుకు ఆస్ట్రేలియా నూతన ప్రధాని ఆంటోని అల్బనీస్ హాజరవుతారని చెప్పారు మోదీ. ఆయనతో ద్వైపాక్షిక సమావేశంలో పాల్గొని ఇరు దేశాల మధ్య సమగ్ర వ్యూహాత్మక భాగస్వామ్యం, పరస్పర ప్రయోజనాల కోసం అంతర్జాతీయ అంశాలపైనా చర్చించనున్నట్లు పేర్కొన్నారు. భారత్, జపాన్ల మధ్య ఆర్థిక సహకారం కోసం ఇరు దేశాల మధ్య ప్రత్యేక వ్యూహాత్మక, గ్లోబల్ భాగస్వామ్యం కీలకమని స్పష్టం చేశారు. గత మార్చిలో జరిగిన సదస్సులో పీఎం కిషిదాతో జరిగిన ఒప్పందాలను గుర్తు చేసుకున్నారు మోదీ. భారత్లో 5 ట్రిలియన్ జపాన్ యెన్ల పెట్టుబడులకు ఒప్పందం కుదిరినట్లు చెప్పారు. సుమారు 40వేల మంది ప్రవాస భారతీయులు జపాన్లో ఉన్నారని, వారే ఇరు దేశాల మధ్య సత్సంబంధాలకు వారిధిగా పేర్కొన్నారు.
ఇండో ఫసిపిక్లో చైనాపై:
భారత్, అమెరికా, ఆస్ట్రేలియా, జపాన్ భాగస్వామ్యంతో ఏర్పాటైన క్వాడ్ కూటమి మే 24న జపాన్‌లోని టోక్యో సమావేసం కానుంది. ఎప్పటిలాగే ఈసారి కూడా క్వాడ్‌దేశాలు చైనాపై దృష్టి సారించే అవకాశాలున్నట్లు తెలుస్తోంది. ఇండో- పసిఫిక్‌ సముద్రంలో.. చైనా చేస్తున్న అక్రమ చేపల వేటను సమీక్షించాలని క్వాడ్ యోచిస్తున్నట్లు సమాచారం. ఇండో-పసిఫిక్‌ సముద్రంలో జరిగే అక్రమ చేపల వేటల్లో 95 శాతం చైనా దేశస్థులవేనని అంచనా. ఈ నేపథ్యంలో అక్కడ ఉపగ్రహ ఆధారిత పర్యవేక్షణను ఏర్పాటు చేయాలని క్వాడ్‌కూటమి భావిస్తోంది. ఇది ఆచరణ రూపం దాలిస్తే ఇండో-పసిఫిక్‌తీరంలో చైనా కార్యక్రమాలపై డేగ కన్ను వేసేందుకు వీలవుతుంది.హిందూ-పసిఫిక్‌ సముద్ర తీర దేశాల్లో స్వేచ్ఛాయుత భాగస్వామ్యాలే లక్ష్యంగా.. చతుర్భుజ భద్రతా కూటమి-క్వాడ్ ఏర్పాటైంది. అలాగే ఇండో- పసిఫిక్‌తీరంలో చైనా మిలటరీ ఆధిపత్యానికి చెక్‌పెట్టేలా క్వాడ్ భాగస్వామ్య దేశాలైన భారత్, అమెరికా, ఆస్ట్రేలియా, జపాన్ ఇప్పటికే పలు కీలక నిర్ణయాలను తీసుకున్నాయి. ఈ నేపథ్యంలో తాజాగా జరగబోయే సమావేశంలోనూ చైనాను కట్టడి చేసేందుకు ఎలాంటి ఉమ్మడి కార్యాచరణను క్వాడ్‌కూటమి ప్రకటిస్తుందో అన్న ఆసక్తి ప్రపంచ దేశాల్లో నెలకొంది.
