ఎర్ర చీమల గుడ్ల పచ్చడి.. ఈ మాట ఎక్కడైనా విన్నారా? ఎర్ర చీమల గుడ్లతో పచ్చడి చేస్తారా.. అని ఆశ్చర్యపోతున్నారా? నిజమేనండి మన్యంలోని ఆదివాసీలు ఎర్ర చీమల గుడ్లను సేకరించి పచ్చడి చేసుకుని ఇష్టంగా తింటారు. ఆదివాసీ ప్రాంతాల్లో జరిగే సంతలో ఎర్ర చీమల గుడ్లను విక్రయిస్తారు. అసలు వీటిని ఎలా సేకరిస్తారు. పచ్చడి ఎలా చేస్తారో చూద్దామా..!
ఎర్ర చీమలు అంటేనే అవి కుడతాయని, అవి కుడితే చర్మంపై మంటలతో బొబ్బలు ఎక్కుతాయని మనకు తెలిసిందే. అందుకే ఎర్ర చీమలు కనబడితే వాటిన దూరంగా నెట్టేస్తాం. లేదా దూరంగా పారిపోతాం. కానీ గిరిజనులు మాత్రం ఎర్ర చీమలను వెంటాడి వేటాడి పట్టుకొని వాటి గూడులోని చీమల గుడ్లను సేకరించి పచ్చడి చేసుకుని ఇష్టంగా ఆరగిస్తారు.
చెట్టు కొమ్మలకు గూడు కట్టిన ఎర్ర చీమలుతెలంగాణలోని భద్రాద్రి కొత్తగూడెం జిల్లా చర్ల, దుమ్ముగూడెం మండలాలు, తెలంగాణ సరిహద్దు ఛత్తీస్గఢ్ ప్రాంతాల్లోని ఆదివాసీలు ఎండాకాలం వచ్చిందంటే ఎర్ర చీమల గుడ్లను సేకరించి పచ్చడి చేసుకుని తింటారు. సంతల్లో కూడా వీటిని విక్రయిస్తుంటారు. ముందు అడవుల్లోకి వెళ్లి పెద్ద పెద్ద చెట్ల చివర భాగాల్లో ఎర్ర చీమలు ఆకులతో పెట్టుకున్న గూడును కర్రలతో కొట్టి కింద పడేస్తారు. ఒకవైపు చీమలు కరుస్తున్నా.. పట్టించుకోకుండా ఆ గూడులోని ఎర్ర చీమలను బయటకు తీసేసి చీమల గుడ్లను సేకరిస్తారు.
చీమల గుడ్ల వేటకు బయలుదేరిన ఆదివాసీలురోటిపై నూరి: ఆ గుడ్లను బుట్టల్లో ఇంటికి తీసుకువెళ్లి పచ్చడి తయారు చేసుకుంటారు. ఆ గుడ్లను ఉడకబెట్టి, ఉల్లిపాయలు, పచ్చిమిర్చి రోటిపై నూరి ఉప్పు కలిపి గుడ్లను కూడానూరి పచ్చడి తయారు చేసుకుంటారు. పచ్చడిని వేడి వేడి అన్నంలో కలుపుకొని ఇష్టంగా ఆరగిస్తారు. ప్రస్తుతం ఎండాకాలం కావడంతో మన్యంలోని గిరిజనులంతా అడవుల్లోకి వెళ్లి ఎర్ర చీమల గుడ్లను సేకరించే పనిలో నిమగ్నమయ్యారు.
