ప్రస్తుత కాలంలో ప్రతి ఒక్కరూ ఫిట్గా ఉండాలని కోరుకుంటారు. ఎన్నో ఆరోగ్య సమస్యలకు మూలమైన ఊబకాయానికి దూరంగా ఉండాలనుకుంటారు. కానీ.. అధిక బరువు ఉంటే చాలా సమస్యలు వస్తుంటాయి. ఓ వ్యక్తి ఏకంగా 200 కిలోలకుపైనే ఉన్నాడు. నడవడం కూడా చాలా కష్టం. ఎటు వెళ్లాలన్నా బుల్లెట్టే దిక్కు. రోజుకు 15 కిలోల ఆహారం పొట్టలోకి వెళ్లాల్సిందే. అతడే.. బిహార్ కటిహార్కు చెందిన రఫీక్ అద్నాన్. ఇక అతడి ఆహారపు అలవాట్ల గురించి తెలిస్తే షాకవ్వాల్సిందే..
అతడు ప్రజాప్రతినిధి కాదు.. ఊరి పెద్ద అంతకన్నా కాదు.. కానీ ఓ ప్రత్యేక కారణంతో చుట్టుపక్కల పదూళ్ల ప్రజలందరికీ తెలుసు. దీని వెనుక కారణం ఊబకాయం. అవును.. బిహార్లోని కటిహార్ జిల్లా జయనగర్కు చెందిన రఫీక్ అద్నాన్ బరువు 200 కిలోలకుపైనే. ఇదే ఇప్పుడు అతడికి పెద్ద సమస్యగా పరిణమించింది. ఎటూ కదల్లేక ఎన్నో కష్టాలు పడుతున్నాడు. పెళ్లై ఇద్దరు భార్యలున్నా.. పిల్లలు కూడా కలగలేదు. దానికీ ఇతడి అతిబరువే కారణం.
రఫీక్ అద్నాన్అద్నాన్ మెనూలో ప్రతిరోజూ.. 3 కిలోల రైస్, నాలుగు కేజీల పిండితో చేసిన రోటీలు, రెండు కిలోల చికెన్, కిలోన్నర చేపలు, 3 లీటర్ల చొప్పున పాలు ఉండాల్సిందే. ఇలా మొత్తం రోజులో సుమారు 14-15 కేజీల ఆహారం భుజిస్తాడు. అంతే మొత్తంలో మంచినీరు తాగాల్సిందే. చిన్నప్పటి నుంచే బరువుండేవాడినని, కానీ ఇప్పుడు అతి బరువుతో తీవ్ర ఇబ్బంది పడుతున్నట్లు రఫీక్ చెప్పుకొచ్చాడు.obesity patientరఫీక్ అద్నాన్
”చిన్నప్పటి నుంచి నేను ఇలాగే ఉండేవాడిని. కానీ ఇప్పుడు ఇంకా భారీగా బరువు పెరిగాను. అధిక బరువు కారణంగా బుల్లెట్పై వెళ్లటం కూడా ఇబ్బందిగానే ఉంది. ఇప్పుడు 200 కేజీలు ఉన్నాను. చాలా ఇబ్బందులు పడుతున్నాను. నాకు పెళ్లయింది కానీ పిల్లలు లేరు. అధిక బరువే అందుకు కారణం. రెండు క్వింటాళ్ల బరువు కారణంగా నడవలేకపోతున్నా. రోటీ, అన్నం, మాంసం తింటాను.”- రఫీక్ అద్నాన్, స్థూలకాయుడు
నడవడం కూడా కష్టంగా మారినందున ఎటు వెళ్లాలన్నా బండే దిక్కు. రఫీక్ బరువును తట్టుకోవడం మామూలు బైక్ వల్ల సాధ్యం కావడం లేదని.. బుల్లెట్ బండి కొనుక్కున్నాడు. కానీ.. అది కూడా అప్పుడప్పుడు మొరాయిస్తోంది. స్థూలకాయం కారణంగా రఫీక్.. స్థానికుల నుంచి ఎన్నో అవమానాలు ఎదుర్కొంటున్నాడు. భోజనం మొత్తం తినేస్తాడని.. పెళ్లిళ్లకు, ఇతర వేడుకలకు కూడా రఫీక్ను ఎవరూ పిలవడం లేదు. అయితే.. స్వతహాగా రైతు అయిన అద్నాన్కు ఆర్థిక సమస్యలు పెద్దగా లేవు. ధాన్యం వ్యాపారం కూడా ఉంది. భారీకాయుడి రఫీక్ అద్నాన్రఫీక్.. బులీమియా నెర్వోసా అనే వ్యాధితో బాధపడుతున్నాడని చెప్పాడు స్థానిక వైద్యుడు మృణాల్ రంజన్. ఇదో ఈటింగ్ డిసార్డర్ అని, అలాంటివారు భారీ పరిమాణంలో తింటారని వివరించాడు.
బులీమియా నెర్వోసా అంటే?: బులీమియా నెర్వోసా వ్యాధి ఎక్కువగా జన్యుపరంగా వస్తుంది. కొన్నిసార్లు ఇతర కారణాల వల్ల కూడా కలుగుతుంది. దీని కారణంగా వ్యక్తి ప్రవర్తన మారుతుంది. భయాందోళనలకు గురవుతాడు. ఆత్మవిశ్వాసం కూడా తగ్గుతుంది. అకస్మాత్తుగా బరువు పెరగడం, తగ్గడం జరుగుతుంటుంది. ఈ వ్యాధి పట్ల నిర్లక్ష్యంగా ఉండకూడదని వైద్యులు చెబుతున్నారు. చుట్టుపక్కల అలాంటి వ్యక్తులు ఎవరైనా కనిపిస్తే.. డాక్టర్లకు చూపించాలని సూచిస్తున్నారు. డైటీషియన్, సైకియాట్రిస్ట్ సహా కౌన్సిలింగ్ కూడా అవసరమని అంటున్నారు. మెరుగైన చికిత్స, వైద్యుల పర్యవేక్షణ, సరైన ఆహార ప్రణాళికతో దీనిని నయం చేయవచ్చని చెబుతున్నారు.
