నార్త్ అమెరికా తెలుగు సొసైటీ(నాట్స్).. పెదనందిపాడులో(గుంటూరు) ఆదివారం ఉచిత కంటి వైద్య శిబిరాన్ని ఏర్పాటు చేసింది. నాట్స్ అధ్యక్షుడు బాపయ్య చౌదరి నూతి(బాపు), నాట్స్ బీఓడీ చైర్‌వుమన్ అరుణ గంటి నేతృత్వంలో ఏర్పాటైన ఈ శిబిరానికి స్థానికులు పెద్ద సంఖ్యలో హాజరయ్యారు. పెదకాకానీలోని శంకర ఐ హాస్పిటల్, గుంటూరు డిస్ట్రిక్ట్ బ్లైండ్ కంట్రోల్ సొసైటీ సహకారంతో నాట్స్ బృందం..పెదనందిపాడు ఆర్ట్స్ అండ్ సైన్స్ కాలేజీలో వైద్య శిబిరాన్ని నిర్వహించింది. కాగా.. ఈ శిబిరంలో పాల్గొన్న పురప్రముఖులు నాట్స్ అధ్యక్షుడి కృషిని ప్రశంసించారు.
ఈ సందర్భంగా విజ్ఞాన్ విద్యాసంస్థల అధినేత లావు రత్తయ్య మాట్లాడుతూ నాట్స్ అధ్యక్షుడు బాపయ్య చౌదరిపై ప్రశంసల వర్షం కురిపించారు. కంటి సమస్యలున్న వారికి కళ్లద్దాలను కూడా ఈ శిబిరంలో ఉచితంగా ఇవ్వడం ముదావహమన్నారు. ఇటువంటి కార్యక్రమాలను నాట్స్ మరిన్ని నిర్వహించాలని తాను కోరుకుంటున్నట్టు తెలిపారు. దేశం కోసం పాటుపడ్డ ఎందరో మహనీయుల స్ఫూర్తితోనే తాము ఈ శిబిరం ఏర్పాటుకు సంకల్పించినట్టు బాపయ్య చౌదరి పేర్కొన్నారు. పెదనందిపాడులో పుట్టి దేశానికే గర్వకారణంగా నిలిచిన పలువురు ప్రముఖుల గురించి ఆయన ఈ సందర్భంగా ప్రస్తావించారు.
