10 వేల ఏళ్ల నాటి త్రిశూలం, 3 వేల ఏళ్ల కిందటి వజ్రాయుధాన్ని కర్ణాటకకు చెందిన వ్యాపారవేత్త సయ్యద్ శామీర్ హుస్సేన్ బెంగళూరులోని ప్రెస్ క్లబ్లో ప్రదర్శించారు. అనంతరం మీడియాతో మాట్లాడుతూ.. ‘ 2015 మే నెలలో ఫిలిప్పిన్స్ మైనింగ్ తవ్వకాలల్లో ఈ త్రిశూలం, వజ్రాయుధం బయటపడ్డాయి. 2012 నుంచి ఫిలిప్పిన్స్ కాపర్, గోల్డ్ మైనింగ్ల్లో నేను భాగస్వామిని. వ్యాపార రీత్యా నేను నా సమయాన్ని ఫిలిప్పిన్స్లోనే ఎక్కువగా గడుపుతుంటాను. అలాగే అక్కడి పౌరులతో కలిసి పనిచేయడం వల్ల వారితో దగ్గరి సంబంధాలు ఏర్పడ్డాయి. ఈ క్రమంలో 2015 మే 5వ తేదీన మైనింగ్ సూపర్వైజర్.. తాను మునుపెన్నడూ చూడని వస్తువులు తవ్వకాలలో బయటపడ్డాయని తెలిపారు. వాటిని నీటితో శుభ్రం చేశాము. అందులో ఒకటి చూడడానికి దేవుడి విగ్రహం వలే ఉంది. ఇక రెండోది త్రిశూలంగా గుర్తించాము. అయితే ఈ రెండూ కూడా హిందు పురాణాలకు సంబంధించిన వస్తువులుగా నిర్ధరించాము. వాటిని ఇంటికి తీసుకెళ్లి వాటి ఫొటోలను నా స్నేహితులందరికీ పంపాను. వాటిపై పరిశోధన చేసిన తర్వాత ఇంటర్నెట్లో కూడా వెతికాను. అప్పుడు నాకు అర్థం అయ్యింది. త్రిశూలంతో పాటు దొరికిన మరో వస్తువు వజ్రాయుధం అని తెలిసింది. అది హిందూ పురాణాల్లో ఇంద్రభగవానుడి ఆయుధం, త్రిశూలం శివుడిది అయ్యుండవచ్చని అభిప్రాయపడ్డాను. తర్వాత భారత్కు వచ్చి పురావస్తు శాఖ వారిని సంప్రదించాను. పురావస్తు శాఖ మాజీ అధికారి అంజనీ మున్షీ వాటిని పురాతన వస్తువులుగా ఆమోదించారు’ అని అన్నారు.
