వారధి ఇండియా ఫౌండేషన్ 2026 వార్షికోత్సవం

వారధి ఇండియా ఫౌండేషన్ 2026 వార్షికోత్సవం శనివారం నాడు హైదరాబాద్‌లో ఘనంగా నిర్వహించారు. ఆంధ్రప్రదేశ్, తెలంగాణ రాష్ట్రాల్లోని ప్రభుత్వ పాఠశాలల విద్యార్థుల ప్రతిభను విజయాలను గుర్తించి ప్రోత్సహించే లక్ష్యంతో వారధి ఇండియా ఫౌండేషన్ ఏర్పాటు అయింది. ఉమ్మడి ఆంధ్రప్రదేశ్ మాజీ ప్రధాన కార్యదర్శి డా. మోహన్ కందా 2013లో వారధిని స్థాపించారు. విద్య ద్వారా సాధికారత అనే స్ఫూర్తితో దేశానికి సానుకూల మార్పు తీసుకురాగలిగేలా భావితరాలను తీర్చిదిద్దడం సంస్థ ప్రధాన లక్ష్యం.

ప్రభుత్వ విద్యావ్యవస్థలు, సంస్థలు, ఉపాధ్యాయులను బలోపేతం చేసి, వారికి అవసరమైన మద్దతును అందించడం ఈ ఫౌండేషన్ ప్రధాన విధానం.
ఈ ఏడాది ఆంధ్రప్రదేశ్, తెలంగాణ రాష్ట్రాల్లోని 52 జిల్లాల నుంచి 305 మంది విద్యార్థులు రాష్ట్రస్థాయి వ్యాసరచన, చర్చా పోటీల్లో పాల్గొన్నారు. విజేత జట్లకు మొదటి బహుమతిగా ₹33,000, రెండవ బహుమతిగా ₹30,000, మూడవ బహుమతిగా ₹27,000 అందించారు. పర్యావరణవేత్త, వాటా ఫౌండేషన్ వ్యవస్థాపక ట్రస్టీ ఉదయకృష్ణ పెద్దిరెడ్డి, నటుడు సుమంత్ అతిథులుగా పాల్గొన్నారు.