అతిలోక సుందరి శ్రీదేవి, బోనీ కపూర్‌ల చిన్న కూతురు ఖుషి కపూర్ బాలీవుడ్‌లోకి ఎంట్రీ ఇవ్వనుందా.. ఆమె నటించే సినిమా షూటింగ్ ఏప్రిల్‌లో ప్రారంభం కానుందా అంటే.. అవుననే సమాధానం వినిపిస్తోంది. జోయా అక్తర్ తెరకెక్కించబోయే సినిమాతో ఖుషి బాలీవుడ్‌లోకి ఎంట్రీ ఇవ్వబోతుందని తెలుస్తోంది. షారూఖ్ ఖాన్ కూతురు సుహానా ఖాన్, బిగ్ బీ మనవడు అగస్త్య నందా కూడా ఈ చిత్రంలో నటించనున్నట్టు బీ టౌన్‌లో గుసగుసలు వినిపిస్తున్నాయి.
తాజాగా ఖుషి కపూర్ తండ్రి బోనీ కపూర్ కూడా ఆమె ఎంట్రీ గురించి ప్రస్తావించాడు. ‘‘ఖుషికి నటనలో చాలా ఆసక్తి ఉంది. తండ్రిగా ఆమె నిర్ణయాన్ని నేను గౌరవిస్తాను. అర్జున్ కపూర్, జాన్వీ కపూర్ మంచి సినిమాల్లో నటిస్తున్నారు. వారికి ఏ అవసరం వచ్చినా నేను ఎప్పుడు తోడుగా ఉంటాను. ఖుషి నటించే సినిమా షూటింగ్ ఏప్రిల్‌లో మొదలవుతుంది. నేను అంతకంటే ఎక్కువ వివరాలు చెప్పలేను. త్వరలోనే మీకు అన్నీ తెలుస్తాయి’’ అని బోనీ కపూర్ చెప్పాడు. ‘దిల్ దఢ్కనే దో’, ‘జిందగీ నా మిలేగీ దోబారా’ వంటి హిట్ చిత్రాలకు దర్శకత్వం వహించిన జోయా అక్తర్.. అర్చీస్ కామిక్స్‌ను బాలీవుడ్‌లోకి రీమేక్ చేస్తుంది. ఆమె నెట్‌ఫ్లిక్స్ కోసం ఈ చిత్రాన్ని నిర్మిస్తుంది. ఈ మూవీలో వెరోనికా పాత్రలో ఖుషి, అర్చీ పాత్రలో అగస్త్య, బెట్టీ పాత్రలో సుహానా నటించనుందని బాలీవుడ్ మీడియా తెలుపుతోంది.
