నీటిలో సంచరిస్తూ మందుపాతరల జాడ కనిపెట్టగల ‘స్వతంత్ర జలాంతర్గత వాహనం (ఏయూవీ)’ను(Autonomous Underwater Vehicle) (AUV) పశ్చిమ బెంగాల్‌ రాజధాని కోల్‌కతాలో శుక్రవారం ఆవిష్కరించారు. ‘నీరాక్షి’గా పిలుస్తున్న ఈ ఏయూవీని కోల్‌కతాలోని గార్డెన్‌ రీచ్‌ షిప్‌బిల్డర్స్‌ అండ్‌ ఇంజినీర్స్‌ (జీఆర్‌ఎస్‌ఈ) లిమిటెడ్‌(GRSE), ఏఈపీఎల్‌(AEPL) అనే మరో కంపెనీలు సంయుక్తంగా అభివృద్ధి చేశాయి. మన దేశంలో ఈ తరహా జలాంతర్గత వాహనం ఇదే మొదటిది. నీరాక్షి స్థూపాకారంలో ఉంటుంది. దాని పొడవు 2.1 మీటర్లు. వ్యాసం దాదాపు ఒక అడుగు. బరువు 45 కిలోలు. మరో 6-12 నెలల్లో వాణిజ్య వినియోగానికి అనుగుణంగా దాన్ని అందుబాటులోకి తీసుకొచ్చే అవకాశాలు ఉన్నాయి. ఆలోగా భారత నౌకాదళం, సైన్యం ఈ ఏయూవీని ప్రయోగాత్మకంగా పరీక్షిస్తాయి. ప్రస్తుతానికి మందుపాతరలను గుర్తించే సామర్థ్యమే ఉన్నప్పటికీ.. వాటిని నిర్వీర్యం చేయడంతో పాటు జలాంతర్గత సర్వేలు చేపట్టేందుకు వీలుగా భవిష్యత్తులో దాన్ని తీర్చిదిద్దనున్నారు.
