సింగపూర్ ఓపెన్‌లో భారత అగ్రశ్రేణి క్రీడాకారులు పి.వి.సింధు, సైనా నెహ్వాల్‌, కిదాంబి శ్రీకాంత్‌ల జోరు కొనసాగుతోంది. వీరంతా క్వార్టర్‌ఫైనల్లోకి దూసుకెళ్లారు. గురువారం జరిగిన మహిళల సింగిల్స్‌ ప్రిక్వార్టర్స్‌లో నాలుగో సీడ్‌ సింధు 21-13, 21-19తో మియా బ్లిచ్‌ఫెల్డ్‌ (డెన్మార్క్‌)పై విజయం సాధించింది. ఆరో సీడ్‌ సైనా 21-16, 18-21, 21-19తో పోర్న్‌పావీ చొచువాంగ్‌ (థాయ్‌లాండ్‌)పై నెగ్గింది. ప్రపంచ 21వ ర్యాంకర్‌ పోర్న్‌పావీపై విజయం కోసం సైనా చెమటోడ్చింది. పురుషుల సింగిల్స్‌ ప్రిక్వార్టర్స్‌లో ఆరో సీడ్‌ శ్రీకాంత్‌ 21-12, 23-21తో హన్స్‌ క్రిస్టియన్‌ (డెన్మార్క్‌)పై, సమీర్‌వర్మ 21-15, 21-18తో గ్వాంగ్జు (చైనా)పై గెలుపొందారు. పారుపల్లి కశ్యప్‌ 9-21, 21-15, 16-21తో చెన్‌ లాంగ్‌ (చైనా) చేతిలో, ప్రణయ్‌ 11-21, 11-21తో కెంటొ మొమొట (జపాన్‌) చేతిలో ఓడారు. మిక్స్‌డ్‌ డబుల్స్‌లో ప్రణవ్‌ చోప్రా- సిక్కిరెడ్డి 21-17, 6-21, 21-19తో టాంగ్‌ చున్‌- యింగ్‌ సుత్‌ (హాంకాంగ్‌)పై గెలిచి క్వార్టర్స్‌ చేరుకున్నారు. మహిళల డబుల్స్‌ ప్రిక్వార్టర్స్‌లో పూజ- సంజన 15-21, 12-21తో ముత్సుయామ- చిహరు (జపాన్‌) చేతిలో ఓడారు.
