కర్ణాటక శాసనసభ స్పీకర్‌గా యూటీ ఖాదర్ ఏకగ్రీవంగా ఎన్నికయ్యారు. ఖాదర్ పేరును ముఖ్యమంత్రి సిద్ధరామయ్య ప్రతిపాదించగా, ఉప ముఖ్యమంత్రి డీకే శివకుమార్ బలపరిచారు. స్పీకర్ పదవికి ఆయన ఒక్కరే నామినేషన్ వేయడంతో ఎన్నిక ఏకగ్రీవం అయింది.
ఖాదర్ కర్ణాటక శాసనసభకు 23 వ స్పీకర్ కాగా కర్ణాటక శాసనసభ స్పీకర్‌గా పనిచేసిన తొలి ముస్లిం ఆయనే కావడం విశేషం. ఈ సందర్భంగా సీఎం సిద్ధరామయ్య, డీకే శివకుమార్, మాజీ ముఖ్యమంత్రి బసవరాజ్ బొమ్మై, మంత్రి జి. పరమేశ్వర తదితరులు ఖాదర్‌ను అభినందించారు.
ఐదుసార్లు ఎమ్మెల్యేగా గెలిచిన ఖాదర్ ప్రస్తుతం మంగళూరు నుంచి ప్రాతినిధ్యం వహిస్తున్నారు. ఖాదర్ గతంలో మంత్రిగా కూడా పనిచేశారు. 2013-18లో సిద్ధరామయ్య నేతృత్వంలోని ప్రభుత్వంలో ఆరోగ్య, ఆహార, పౌరసరఫరాల శాఖ మంత్రిగా పనిచేశారు.
2018-19లో జెడి(ఎస్)-కాంగ్రెస్ సంకీర్ణ ప్రభుత్వంలో ఖాదర్ … హౌసింగ్ అండ్ అర్బన్ డెవలప్‌మెంట్ శాఖలను నిర్వహించారు.
