ఒకేసారి ఎక్కువ దుస్తులు కొనేస్తుంటారు కొందరు. తీరా కొన్నాక… వాటిల్లో కొన్ని నచ్చక పక్కన పడేస్తారు. ఇలాంటి సమస్యలు ఎదురుకాకుండా ఉండాలంటే… ఏం చేయాలో చూడండి.
* షాపింగ్‌కు వెళ్లేముందు గతంలో కొని వాడకుండా బీరువాలో పెట్టిన దుస్తుల్ని బయటకు తీయండి. వాటికి మెరుగులు దిద్దుకుంటే కొత్త లుక్‌ వస్తుందేమో ప్రయత్నించి చూడండి. ఆ తరువాతే కొత్తవి కొనాలా వద్దా అనే నిర్ణయం తీసుకోండి.
* కొన్ని రకాల వస్త్రాలు చూడగానే నచ్చుతాయి. తీరా కొన్నాక వేసుకుంటే బాగుండవు. ఈ సమస్య ఎదురుకాకుండా ఉండాలంటే… కొనేముందు కచ్చితంగా వేసుకుని చూడాలి. రంగు బాగుందనో, మన వద్ద అలాంటి మోడల్‌ లేదనో కొంటే డబ్బు వృథా అవుతుంది.
* శరీరాకృతికి సరిపోయే వాటినే ఎంచుకోవాలి. తక్కువ సైజు ఉండేవి వేసుకుంటే చూడటానికి ఎబ్బెట్టుగా కనిపిస్తారు. అలాగని వదులుగా ఉండేవి ఎంచుకుంటే లావుగా కనిపిస్తారని మరవకండి.
* ఒకేసారి ఎక్కువ బట్టలను కొనడమూ మంచిది కాదు. కొన్న తరువాత కొన్ని రోజులకు బరువు పెరిగినా, తగ్గినా అవి నిరుపయోగం అవుతాయి. సందర్భానికి సరిపోయేలా ఒకటి రెండు రకాల జతలు కొత్తవి ఎంచుకుంటే చాలు.
* ప్రతిసారి ఒకేరకమైనవి కొనకుండా… మార్కెట్‌లోకి వచ్చిన నయా ట్రెండ్‌లో మీకు నచ్చిన ఒకటి, రెండు మోడళ్లను ఎంచుకొని ప్రయత్నించండి. నప్పితే ప్రయోగం చేసినవారవుతారు. మీకంటూ కొత్త లుక్‌ సొంతమవుతుంది.
* షాపింగ్‌కు వేళ్లేటప్పుడు ఎవరో ఒకరిని తోడు తీసుకెళ్తారు మహిళలు. అది మంచిదే కానీ… ఎంపిక చేసుకున్న జతల్లో ఏవి బాగున్నాయని మాత్రమే వారిని అడగాలి. అంతేతప్ప రంగు, మోడల్‌కు సంబంధించిన అంశాలపై సలహా అడగకూడదు.
