కరోనా వైరస్‌ వ్యాప్తి కారణంగా బంగారం దిగుమతులు తీవ్రంగా ప్రభావితమయ్యాయి. కరెంట్ అకౌంట్ లోటు (సీఏడీ) ప్రధాన భాగస్వామి అయిన బంగారు దిగుమతులు ప్రస్తుత ఆర్థిక సంవత్సరం మొదటి అర్ధభాగంలో 57 శాతం తగ్గాయి. ఈ విషయాన్ని కేంద్ర వాణిజ్య మంత్రిత్వ శాఖ గణాంకాలు వెల్లడిస్తున్నాయి. ఏప్రిల్ నుంచి సెప్టెంబర్ వరకు 6 నెలల్లో 6.8 బిలియన్ డాలర్ల (రూ.50,658 కోట్లు) విలువైన బంగారం దిగుమతి జరిగింది. ఏడాది క్రితం ఇదే కాలంలో 15.8 బిలియన్ డాలర్లు (రూ.1,10,259 కోట్లు) దిగుమతి అయ్యాయి. మంత్రిత్వ శాఖ గణాంకాల ప్రకారం.. ఏప్రిల్-సెప్టెంబర్ అర్ధ సంవత్సరంలో వెండి దిగుమతులు కూడా బాగా పడిపోయాయి. ఈ కాలంలో రూ.5,533 కోట్ల వెండిని 733.57 మిలియన్ డాలర్లకు దిగుమతి చేసుకున్నారు. ఏడాది క్రితం ఇదే కాలంతో పోలిస్తే ఇది 63.4 శాతం పడిపోయింది.
