ఆ గొంతులో ప్రేమాయణమూ
పురాణమే..!
🎼🎼🎼🎼🎼🎼🎼
ఆ గొంతులో మంత్రమే ఉందో
మహిమే దాగుందో..
మహత్తే ఇమిడిపోయిందో..
గమ్మత్తే నిండి
నిభిడీకృతమైందో…
దేవగానమే ఆవిష్కృతమైందో..
మొత్తానికి ఆ గళం
స్వరరాగ గంగాప్రవాహం
గంధర్వుల ఆవాహం..!
రాముడికి రామదాసు
అయ్యప్పకి ఏసుదాసు
నగలు చేయించి నిలదీసాడేమో గోపన్న
పాటలు నీరాజనమిచ్చి
కరిగిపోయాడీ ఏసుదాసన్న..
ఆయన పాటే
శబరిగిరీశుడికి సాపాటు
ఆ పాటే ఏడుమెట్ల
అయ్యకు పవళింపు..
కోట్లాది భక్తులకు
అయ్యప్ప లీలలపై ఆకళింపు..
ఆ గొంతే భక్తిపారవశ్యాల మేళవింపు..!
ఆయన ఆవేశం మేఘసందేశం
ఆ స్వరంలో విషాదం
గాలివానలో హోరునీటిలో
పడవ ప్రయాణం..
ఉమాపతి లయ విన్యాసం
దళపతి నాట్య విలాసం..!
ఘంటసాల గొంతులో
అందమైన టెక్నిక్
బాలు గళంలో
హుషారెక్కించే పిక్నిక్
ఏసుదాసు కంఠంలో
మత్తెక్కించే మేజిక్..
ఆయన పాడితే
ముద్దబంతి పూలలో
మూగబాసలు…
మూసి ఉన్న రెప్పలపై
ప్రేమలేఖలు..
పంచుకునే మనసుంటే
ప్రతి అభిమానికి
మధుమాసమె
అవుతుంది ఎల్లవేళలా..
మూగకోయిల మురిసింది
మృధుమధురంగా..
ఈ గండుకోయిల
పాడితే మనోహరంగా..!
ఎనిమిది పదులు
పైబడిన వయసు
గొంతుదేమో కుర్ర మనసు
హిందీలోనూ
ఆజ్ సె పెహలే
ఆజ్ సె జాదా..
ఊపెయ్యలేదా..
ఒక్క చిత్ చోర్ తోనే
అయిపోలేదా
జాతి మొత్తం ఫిదా..
ఒక తరం గాయకుల
నాయకుడు జేసుదాసు..
ఎన్నో తరాల భక్తులకు
అనురక్తుడు
ఈ అయ్యప్పదాసు..
మతాన్ని మించి
అభిమతాన్ని గెలిచి
సమ్మతంగా నిలిచి
గానమాధుర్యంతో
దేవుడినే భువిపైకి దించి
ఇలపై మెరిసి మురిసి
పాటల తోటలో
విరిసిన గంధర్వుడు
ఏసుదాసు..
అయ్యప్పకు _పురంధరదాసు..*
మన పాలి
మరో కబీర్ దాసు..!
గంధర్వ గాయకుడు
కె జె ఏసుదాస్
జన్మదిన శుభాకాంక్షలతో..
