యంగ్ టైగర్ ఎన్టీఆర్, మెగా పవర్ స్టార్ రాంచరణ్ తేజ్ హీరోలుగా దర్శకధీరుడు ఎస్ఎస్ రాజమౌళి డైరెక్షన్‌లో వచ్చిన భారీ మల్టీస్టారర్ ‘ఆర్ఆర్ఆర్’. మొదటి ఆట నుంచే పాజిటివ్ టాక్‌ సొంతం చేసుకున్న ఈ మూవీ కలెక్షన్ల పరంగాను కుమ్మేస్తోంది. ముఖ్యంగా అగ్రరాజ్యం అమెరికాలో భారీగా కలెక్షన్లు కొల్లగొడుతోంది. యూఎస్‌లో ఈ మూవీని సరిగమ సినిమాస్, రఫ్తార్ క్రియేషన్స్ దాదాపు 1150కు పైగా లొకేషన్స్‌లో విడుదల చేయడంతో భారీ వసూళ్లు రాబడుతోంది. తాజాగా 11మిలియన్ల(రూ.83.59కోట్లు) మార్క్‌ను అందుకుంది. ఈ విషయాన్ని సరిగమ సినిమాస్, రఫ్తార్ క్రియేషన్స్.. ట్విటర్ ద్వారా వెల్లడించాయి. ఇక ప్రీమియర్స్, తొలిరోజు కలెక్షన్లు కలిపి 5మిలియన్ల మార్క్‌ను(రూ.38.13) దాటేసిన ఈ సినిమా.. ‘బాహుబలి-2′(4.59 మిలియన్ల) రికార్డును బద్దలు కొట్టింది. దీంతో పూర్తి రన్‌టైమ్‌లో ‘ఆర్ఆర్ఆర్’ కలెక్షన్ల పరంగా సరికొత్త రికార్డులు నమోదు చేయడం ఖాయమని సినీ విశ్లేషకులు అభిప్రాయపడుతున్నారు.
