Business

ఏపీలో భారీ రైల్వే ఫ్లై ఓవర్

ఏపీలో భారీ రైల్వే ఫ్లై ఓవర్

ఉమ్మడి నెల్లూరు జిల్లాలో దక్షిణ మధ్య రైల్వే పరిధిలో అత్యంత పొడవైన రైల్‌ ఓవర్‌ రైల్‌ (ఆర్‌ఓఆర్‌) ఫ్లై ఓవర్ అందుబాటులోకి వచ్చింది. విజయవాడ రైల్వే డివిజన్‌ పరిధిలోని గూడూరు-మనుబోలు స్టేషన్ల మధ్య మూడో లైన్‌ పనుల్లో భాగంగా 2.2 కి.మీ. మేర ఈ రైల్‌ ఫ్లైఓవర్‌ను నిర్మించారు. ఇప్పటి వరకు 40 మీటర్ల ఆర్‌ఓఆర్‌ పొడవైనది రికార్డుల్లో ఉండగా.. కొత్త వంతెన దాన్ని అధిగమించింది. దక్షిణ మధ్య రైల్వే, దక్షిణ రైల్వేల మధ్య వివిధ రైళ్ల రాకపోకలకు గూడూరు స్టేషన్‌ ఇంటర్‌ ఛేంజ్‌ పాయింట్‌గా ఉంది. గూడూరు-మనుబోలు మధ్య నిర్మించిన రైల్‌ ఓవర్‌ రైల్‌ జోన్‌లోనే అతి పొడవైనదిగా గుర్తింపు పొందినట్టు రైల్వే అధికారులు తెలిపారు.రెండేళ్లలోనే ఆర్‌వోఆర్‌ పనులు పూర్తిచేశారు. విజయవాడ- గూడూరు మధ్య మూడో లైను పనుల కోసం దక్షిణ మధ్య రైల్వే రూ.3,240 కోట్లు మంజూరు చేసిందని, ఇందులో భాగంగా ఈ బ్రిడ్జిని నిర్మించినట్లు అధికారులు తెలిపారు అత్యాధునిక సాంకేతిక పరిజ్ఞానంతో 32.5 టన్నుల యాక్సిల్‌ లోడుతో రైళ్లు సజావుగా నడిపేలా వంతెన నిర్మాణం చేపట్టారు. గూడూరు రైల్వే జంక్షన్‌ పరిధిలో అత్యధికంగా రైళ్ల రాకపోకలు సాగుతున్నాయి. ఈ ఫ్లై ఓవర్‌ అందుబాటులోకి రావడంతో ఎంతగానో ఉపయోగపడుతుంది అంటున్నారు.

అంతేకాదు ఈ ఫ్లై ఓవర్ అందుబాటులోకి రావడంతో విజయవాడ- రేణిగుంట, చెన్నై- విజయవాడ మధ్య ఎలాంటి అంతరాయం లేకుండా రైళ్ల రాకపోకలు సాగుతాయని భావిస్తున్నారు. ఈ మార్గంలో రైళ్ల సగటు వేగం మెరుగవుతుందంటున్నారు రైల్వే అధికారులు. మనుబోలు–గూడూరు మధ్య సుమారు 10 వరకూ కాలువలు, ఏర్లు ఉన్నాయి. వీటిలో గూడూరు సమీపంలోని పంబలేరు పెద్దది.. దీంతో పాటు సమీపంలోని కొన్ని కాలువలను కలుపుకుని 2.2 కిలోమీటర్ల దూరంతో అతి పొడవైన రైల్వే ఫ్లైఓవర్‌ను నిర్మించారు