ప్రముఖ తమిళ సినీనటుడు, నటి స్నేహ భర్త ప్రసన్నకు విద్యుత్ బోర్డు షాక్ ఇచ్చింది. ప్రసన్న, ఆయన తండ్రి, మామగారి ఇళ్లకు ఏక మొత్తంగా రూ.70వేల దాకా విద్యుత్ బిల్లులు చెల్లించాలంటూ నోటీసు ఇచ్చింది. ఈ విషయమై ప్రసన్న మాట్లాడుతూ తమ ఇళ్ళకు వచ్చిన విద్యుత్ బిల్లును చూసి ఆశ్చర్యపోయానని, 70 వేల వరకు విద్యుత్ ఛార్జీలు చెల్లించడానికి తనకు ఆర్థిక స్థోమత ఉందని, ఇలాంటి విద్యుత్ బిల్లు మధ్యతరగతి కుటుంబీకులకో, పేదలకో వెళ్లి ఉంటే వారి పరిస్థితి ఏమిటని ప్రశ్నించారు. తమ ఇళ్ళకు ప్రతి రెండు మాసాలకు వచ్చే విద్యుత్ బిల్లుల మొత్తం కంటే ఈసారి వచ్చిన విద్యుత్ బిల్లులో పేర్కొన్న సొమ్ము పలురెట్లు అధికమని ప్రసన్న తెలిపారు. ఈ విషయమై విద్యుత్ బోర్డు ఉన్నతాధికారి ఒకరు మాట్లాడుతూ రెండు నెలలకు పైగా రాష్ట్రంలో లాక్‌డౌన్‌ కొనసాగుతుండటంతో మీటర్‌ రీడింగ్‌ల్లో తప్పులు దొర్లాయని, ప్రసన్నకు వెళ్ళిన విద్యుత్ బిల్లు పునఃపరిశీలించి మళ్లీ మీటర్‌ రీడింగ్‌ సక్రమంగా తీసి కొత్త బిల్లు ఇస్తామని పేర్కొన్నారు.
