ఉక్రెయిన్-రష్యా మధ్య యుద్ధమేఘాలు అలుముకుంటున్నాయి. దీంతో ఉక్రెయిన్లోని భారతీయులను స్వదేశానికి తీసుకొచ్చే ప్రక్రియను ముమ్మరం చేసింది విదేశాంగ శాఖ. రెండు దేశాల మధ్య మరో నాలుగు విమానాలను ఆపరేట్ చేయనున్నట్లు తెలిపింది. మరోవైపు గుజరాత్ వడోదరకు చెందిన ఓ యువతి పశ్చిమ ఉక్రెయిన్ నుంచి స్వదేశానికి వచ్చింది.రష్యా-ఉక్రెయిన్ మధ్య పరిస్థితి తీవ్ర రూపం దాల్చిన తరుణంలో భారతీయులను వెనక్కి తీసుకురావాలని కేంద్రం నిర్ణయించింది. రాయబార కార్యాలయ సిబ్బంది సహా ఉక్రెయిన్లో ఉన్న భారతీయ విద్యార్థులను తరలించే ప్రక్రియను మొదలుపెట్టింది. మూడు రోజుల పాటు ఎయిర్ఇండియా ప్రత్యేక విమానాల ద్వారా వీరందరినీ స్వదేశం తీసుకురానుంది. మంగళవారం రాత్రికి తొలి విమానం భారత్కు చేరుకోనుంది.
కేంద్రం సూచన మేరకు ఫిబ్రవరి 22, 24, 26న మూడు విమానాలను భారత్- ఉక్రెయిన్ మధ్య ఆపరేట్ చేయనున్నట్లు ఎయిర్ఇండియా ఇప్పటికే ప్రకటించింది. వీటికి అదనంగా మరో నాలుగు విమానాలు ఫిబ్రవరి 25, 27, మార్చి 6న ఉక్రెయిన్ రాజధాని క్వియ్ నుంచి భారత్ బయల్దేరనున్నట్లు విదేశాంగ శాఖ ప్రకటనలో తెలిపింది. ఇవి కాకుండా ఎయిర్ అరేబియా, ఎయిర్ దుబాయ్, ఖతార్ ఎయిర్వేస్ ఉక్రెయిన్-భారత్ మధ్య సాధారణ విమాన సేవలను కొనసాగిస్తాయని పేర్కొంది.ఉక్రెయిన్లో ఉద్రిక్త పరిస్థితుల నేపథ్యంలో అక్కడున్న ఓ భారత విద్యార్థిని ఆస్థా సింధా స్వదేశం చేరుకుంది. గుజరాత్లో వడోదర తన నివాసానికి సురక్షితంగా వచ్చింది. తన తల్లిదండ్రుల చెంతకు చేరినందుకు ఆనందం వ్యక్తం చేసింది.స్వదేశానికి వచ్చిన విద్యార్థినితాను పశ్చిమ ఉక్రెయిన్లో ఉండి చదువుకుంటున్నానని, ప్రస్తుతం అక్కడ ప్రశాంతంగానే ఉందని ఆస్థా వెల్లడించింది. తల్లిదండ్రులు ఆందోళన చెందడం వల్లే స్వదేశానికి వచ్చినట్లు పేర్కొంది. భారత రాయబార కార్యాలయం ఎప్పటికప్పుడు తమకు సాయం అందించి కీలకంగా వ్యవహరించిందని వివరించింది. ఉక్రెయిన్ను వీడాలని మూడు సార్లు మెయిల్స్, సందేశాల ద్వారా హెచ్చరించందని చెప్పింది.ఉక్రెయిన్లో తమ బిడ్డ భద్రతపై ఎంతగానో కంగారు పడినట్లు ఆస్థా తండ్రి అరవింద్ చెప్పాడు. భారత రాయబార కార్యాలయం, విదేశీ వ్యవహారాల శాఖ సాయం అందించిందని, విమాన టికెట్ ధరను కూడా రూ.లక్ష నుంచి రూ.50వేలకు తగ్గించిందని సంతోషం వ్యక్తం చేశాడు.
