ఇప్పటికే అమెరికా అధ్యక్షుడు జో బైడెన్ ప్రభుత్వంలో పలువురు భారతీయ అమెరికన్ల పలు కీలక బాధ్యతలు నిర్వహిస్తున్న విషయం తెలిసిందే. తాజాగా మరో ఇండో-అమెరికన్‌కు కీలక పదవి దక్కింది. యూఎస్ ఫుడ్ అండ్ డ్రగ్ అడ్మినిస్ట్రేషన్ సంస్థ ప్రిన్సిపల్ అడ్వైజర్‌గా భారత సంతతికి చెందిన విన్ గుప్తా నియమితులయ్యారు. ఎఫ్‌డీఏ ప్రిన్సిపల్ డిప్యూటీ కమీషనర్ జానెట్ వుడ్ కాక్ త్వరలోనే పదవీ విరమణ చేయనున్నారు. ఈ నేపథ్యంలోనే విన్ గుప్తా నియామకం జరిగింది. ఎఫ్‌డీఏ కమీషనర్ రాబర్ట్ కాలిఫ్‌కు ఆయన సలహాదారుగా వ్యవహరిస్తారు. కాగా, విన్ గుప్తా ప్రస్తుతం అమెజాన్ చీఫ్ మెడికల్ ఆఫీసర్‌గా ఉన్నారు. 2022 ఫిబ్రవరి నుంచి ఆయన ఈ పదవిలో కొనసాగుతున్నారు. ఇక ఎఫ్‌డీఏ చాలా కాలంగా కొత్త సలహాదారు కోసం అన్వేషిస్తోంది. ఈ క్రమంలో పల్మోనాలజిస్ట్‌గా మంచి గుర్తింపు, ప్రముఖ న్యూస్ ఏజెన్సీలలో తరచూ కనిపించే విన్ గుప్తా ఈ పదవికి సరైన వ్యక్తిగా యూఎస్ ఎఫ్‌డీఏ భావించింది. అంతేగాక అమెరికా అధ్యక్ష ఎన్నికల ప్రచార సమయంలో అధ్యక్షుడు బైడెన్‌కు కీలక సలహాలు ఇచ్చి ఆయన విజయంలో విన్ గుప్తా కీలకపాత్ర పోషించారు. దీంతో ఎఫ్‌డీఏ ఆయనకే ఈ పదవిని కట్టబెట్టిందని సమాచారం. సలహాదారు హోదాలో తమ హెల్త్ రికమండేషన్‌లపై ప్రజల్లో నమ్మకాన్ని పెంచేందుకు ఆయన కృషి చేస్తారని ఈ సందర్భంగా ఎఫ్‌డీఏ ఆశాభావం వ్యక్తం చేసింది. అయితే, ప్రస్తుతం అగ్రరాజ్యంలో బేబీ ఫార్ములా, అబార్షన్ హక్కులపై ఉద్యమాలు జరుగుతున్న నేపథ్యంలో సలహాదారు పదవి విన్ గుప్తాకు కత్తి మీద సాము అనే చెప్పాలి.
