స్థిరాస్తి దిగ్గజ సంస్థ డీఎల్‌ఎఫ్‌ గత ఆర్థిక సంవత్సరం నాలుగో త్రైమాసికంలో రూ.1,857.76 కోట్ల నికర నష్టాన్ని ప్రకటించింది. ప్రధానంగా తక్కువ పన్ను రేటు వద్ద స్వీకరించిన ఆస్తుల విషయంలో పన్ను తేడాల వల్ల నష్టం వాటిల్లిందని కంపెనీ తెలిపింది. 2018-19 ఇదే త్రైమాసికంలో సంస్థ రూ.436.56 కోట్ల నికర లాభాన్ని నమోదు చేసింది. ఇదే సమయంలో మొత్తం ఆదాయం రూ.2,660.95 కోట్ల నుంచి రూ.1,873.80 కోట్లకు తగ్గింది. 2019-20 పూర్తి ఆర్థిక సంవత్సరానికి రూ.583.19 కోట్ల నికర నష్టాన్ని నమోదు చేసింది. 2018-19 ఆర్థిక సంవత్సరంలో సంస్థ రూ.1,319.22 కోట్ల నికర లాభాన్ని ఆర్జించింది. మొత్తం ఆదాయం రూ.9,029.41 కోట్ల నుంచి రూ.6,884.14 కోట్లకు పరిమితమైంది. ‘ఒకసారి అసాధారణ కేటాయింపులు రూ.272 కోట్లు, ఒన్‌-టైమ్‌ డీటీఏ రివర్సల్‌ రూ.1,916 కోట్ల వల్ల నష్టం పెరిగింద’ని డీఎల్‌ఎఫ్‌ శాశ్వత డైరెక్టర్‌ అశోక్‌ త్యాగి తెలిపారు. కొవిడ్‌-19 మహమ్మారి పరిశ్రమ వారీగా స్వల్పకాలిక గిరాకీని పరిమితం చేసిందని కంపెనీ పేర్కొంది. దీర్ఘకాలానికి పరిస్థితి ఎలా ఉంటుందనేది చూడాల్సి ఉందని, అయితే మాకున్న ఆరోగ్యకరమైన ఆస్తి-అప్పుల పట్టీ, బలమైన బ్రాండ్‌ ఇమేజ్‌, రాజీ లేని నాణ్యత వల్ల దీర్ఘకాలానికి సానుకూల దృక్పథంతో ఉన్నామని డీఎల్‌ఎఫ్‌ వెల్లడించింది.
