సరైన ఆహార వేళలు పాటించకపోవడం, సరిపడని ఆహారం తినడం వల్ల కడుపులో గ్యాస్‌ చేరుతుంది. దాంతో కడుపూ, ఛాతీలో ఇబ్బందిగా అనిపిస్తుంది. దీన్ని నియంత్రించుకోవడానికి మందులకు బదులుగా వంటింట్లో ఉండే దినుసులను వాడితే సరి…
సోంపు: కడుపులో మంటగా ఉంటే కాసింత సోంపు నోట్లో వేసుకుంటే సరి. లేదా రెండు కప్పుల నీటిలో చెంచా సోంపు వేసి బాగా మరిగించాలి. ఈ నీటిని రోజులో రెండుమూడుసార్లు తాగితే ఉపశమనంగా ఉంటుంది. భోజనం చేసిన వెంటనే కొంచెం సోంపు నోట్లో వేసుకుంటే ఆహారం త్వరగా జీర్ణమవుతుంది.
పుదీనా: దీనిలోని ఔషధ గుణాలు ఉదర సమస్యల నుంచి ఉపశమనం కలిగిస్తాయి. కొన్ని నీళ్లలో గుప్పెడు పుదీనా ఆకులు వేసి మరిగించి వడకట్టి తీసుకుంటే సరి.
లవంగాలు: రోజుకు రెండు మూడు లవంగాలు తినడం వల్ల ఆహారం బాగా జీర్ణమవుతుంది. మలబద్ధకం ఉండదు. గ్యాస్‌, కడుపు నొప్పి లాంటి ఇబ్బందులు రావు.
వాము: గ్లాసు నీటిలో అరచెంచా వాము వేసి బాగా మరిగించాలి. దీన్ని కొద్దికొద్దిగా తీసుకుంటే కడుపు ఉబ్బరం తగ్గుతుంది.
బొప్పాయి: కడుపులో మంట, నొప్పి, మలబద్ధకం లాంటి సమస్యలతో బాధపడేవారు రోజూ దీన్ని ఆహారంలో చేర్చుకుంటే ఈ ఇబ్బందుల నుంచి బయటపడొచ్చు. ఇది పొట్టలోని వాయువులను బయటకు పంపిస్తుంది.
