దేశవ్యాప్తంగా అన్ని రాష్ట్రాల్లో కలిపి ఖైదీలపై 2022-23 ఆర్థిక సంవత్సరంలో రూ.2,528 కోట్లు ఖర్చు చేసినట్లు కేంద్ర హోంశాఖ సహాయ మంత్రి అజయ్‌కుమార్‌ మిశ్ర తెలిపారు. బుధవారం రాజ్యసభలో వైకాపా సభ్యుడు ఎస్‌.నిరంజన్‌రెడ్డి అడిగిన ప్రశ్నకు ఆయన సమాధానమిచ్చారు. అత్యధికంగా హరియాణాలో రూ.406 కోట్లు, తరువాత ఉత్తర్‌ప్రదేశ్‌లో రూ.403 కోట్లు ఖర్చయినట్లు వెల్లడించారు. ఆంధ్రప్రదేశ్‌లో రూ.194 కోట్లు ఖర్చు చేస్తే, తెలంగాణలో కేవలం రూ.21 కోట్లే వ్యయమైనట్లు చెప్పారు. 2018లో జైళ్ల సంఖ్య 1,341 ఉండగా, 2022 నాటికి అది 1,330కి తగ్గినట్టు వెల్లడించారు. ఇదే సమయంలో ఆంధ్రప్రదేశ్‌లో జైళ్ల సంఖ్య 105 నుంచి 106కి పెరిగినట్లు తెలిపారు. తెలంగాణలో మాత్రం 49 నుంచి 37కి తగ్గినట్లు వివరించారు.
ఏపీలో 1,893 పంచాయతీలకు సొంత భవనాలు లేవు
ఆంధ్రప్రదేశ్‌లో 13,325 గ్రామ పంచాయతీలు ఉండగా, వాటిలో 1,893 చోట్ల సొంత భవనాలు లేవని కేంద్ర పంచాయతీరాజ్‌ శాఖ సహాయ మంత్రి కపిల్‌ మోరేశ్వర్‌ పాటిల్‌ తెలిపారు. 15వ ఆర్థిక సంఘం అన్‌టైడ్‌ గ్రాంట్స్‌ కింద 2021-22లో రూ.767.14 కోట్లు, 2022-23లో రూ.393.92 కోట్లు కలిపి రెండేళ్లలో రూ.1,161.06 కోట్లు విడుదల చేసినట్లు చెప్పారు. రాష్ట్రీయ గ్రామ్‌ స్వరాజ్‌ అభియాన్‌ కింద 2021-22లో రూ.38.54 కోట్లు మంజూరు చేసినట్లు వెల్లడించారు. ఆయా నిధులను పంచాయతీ భవన నిర్మాణాలు, మరమ్మతులు, ఇతర సౌకర్యాల కోసం ఉపయోగించుకోవచ్చని చెప్పారు.
👉 – Please join our whatsapp channel here –
https://whatsapp.com/channel/0029Va9VucP7oQhZ7fePda2Z
